Mar 13 | MED | STEP | Jisas manga wingti ou ni, wak ropa mbi nimba puⱡnga, elim nga kitip kᵾni wu ti ndi kundpa, “Ik mbo wu ye! Ya kana! Manga ei, ku ou mon pi kai mat ndi, tᵾk rukrᵾng ei kan mon!” nitim.

Mark 13

Jisas Ndi, Manga Wingti Ou Ei, Gu Nimba Nitim

1 Jisas manga wingti ou ni, wak ropa mbi nimba puⱡnga, elim nga kitip kᵾni wu ti ndi kundpa, “Ik mbo wu ye! Ya kana! Manga ei, ku ou mon pi kai mat ndi, tᵾk rukrᵾng ei kan mon!” nitim. 2 Wote Jisas ndi, wu ni kundpa nimba mel, “Enim ya manga ou kanmin mbᵾ nga, na ik ti enim pᵾlᵾi! Ku ou mon pi kai puⱡ puⱡ moⱡpa punum kan manga kᵾⱡ, wote ui ti om ei kᵾn, ya manga ou kᵾⱡ, i etpa muⱡi nambᵾⱡmba. Manga kᵾⱡ rok gu ndangina, ku mbᵾ ᵾⱡmbᵾⱡ nimba, mana omba,” nitim.

3 Wote, Olip komnga ila moⱡpa, manga wingti ou ni tᵾpa, yant ndupa kandpa moⱡnga, Pita, Jeims, Jon kᵾn, Andru kᵾn, mint ok, Jisas elim kou moⱡnga waldᵾk nᵾk mel, “Manga ou rok gu nduing uⱡ ei nant kᵾn etmba? Rok mbᵾ nduing ui ei, nondpa om ei kᵾn, tᵾma ila namba tᵾma ila mbᵾ itangga, kandpᵾn moⱡmina, uⱡ mbᵾ mel etmba?” nᵾk waldᵾtᵾng.

5 Wote Jisas ndi, wu ni kᵾⱡ kundpa nimba mel, “Enim tᵾk tiki punding ei nga, tᵾk mendᵾk muⱡᵾi! 6 Wu minal ndi, na nga mbi ila onmᵾn nᵾk, ‘Na Kraist aⱡᵾm ei ont,’ nᵾk, wamp minal tᵾk tiki punding. 7 Kona nondpa muna, kona roⱡ mbila, el enmin nᵾk, timan rong ndam, numan ᵾkpᵾk ti nᵾtᵾi! Uⱡ mbᵾ etmba ku. Wote, muⱡ mᵾi raⱡ pora ninggil ui ei kokila. 8 Wu mbo rᵾⱡaip kat kᵾn, rᵾⱡaip kat kᵾn el iting. Wote, gapman mat ndi, gapman mat kᵾn el ruing. Kilimbᵾmp kona mbila, ambuⱡpa oⱡa tᵾpa etmba, kump kun kan mam mbᵾ temba. Mindil kᵾⱡ, amp kangambuⱡa ming pilik, mindil normᵾn uⱡ ni mel etmba.

9 Enim tᵾk mendᵾk muⱡᵾi! Na nga mbi ila, enim tᵾk mek puk kot endᵾk, enim atinga manga mbila rok, wote wu nuim mumuk mbᵾ kᵾn, kona rᵾp etmin wu mbᵾ nga kuimp keta ila tᵾk, oⱡa angᵾndᵾk kanda rok, rᵾnang ik kai mat nᵾk ngᵾi nᵾk iting. 10 Ei nga, kuimp tek puk, wamp kona elpa elpa mbila, Got nga rᵾnang ik kai mbᵾ nᵾk ngᵾi! 11 Wote, enim imp molk mek, kot manga ila mek pung ndam, enim ndi, namba ik ti nimp nda nᵾk, kᵾⱡ keⱡ numan ou nduk, pili nᵾpᵾlᵾi! Nambuⱡ emel, nim ant ila, nin ik mbᵾ, Muⱡnga Wingti elim ndi omba, keta ila moⱡpa, nimba ngui ngui etmba. 12 Wu ᵾngᵾn mat ndi, ᵾngᵾn mat rᵾk muⱡangina, rok kunding. Wote tipam ndi, elim nga kangambuⱡa mbᵾ, i ku itangga, rok kunding. Wote, kangambuⱡa mbᵾ ndi, tᵾk ropᵾl rok, mam tipamᵾl mbᵾ nga rᵾk muⱡangina, rok kunding. 13 Na nga mbi ei, enim kᵾn petᵾm uⱡ ei nga, wamp minal ndi, enim numan mbᵾⱡ nguing. Wote, wamp nam ti ndi, uⱡ mindil nui mbila, ronduⱡ mba moⱡum ndam, wamp ei, Got ndi, etpa peng kont tᵾmba.

Uⱡ Kit Mindil Nui Mat Ekit Omba

14 “Enim kᵾnangina, uⱡ kit mindil nui mat, Got nga kona peng Wingti ila ekit ui nawᵾmba, kona ila ekit wangga kᵾning. Jura kona ila moⱡᵾng wamp mbᵾ, nᵾng nᵾk, nde pana komnga mong mbila pᵾi! 15 Wamp ti, manga ui ila, oⱡa mba moⱡum ndam, mana omba manga ila mukᵾr mba mel ti, tᵾpa mepa mbi nimba iti nᵾtangga! 16 Wu ti, kongun kona ila moⱡum ndam, mang kona omba wal pᵾki ekit orunga kᵾⱡ, timp nimba pi nᵾpangga! 17 Ui ei kᵾn, amp kangambuⱡa mondᵾk moⱡᵾng mbᵾ kep, wote kangambuⱡa aim ngᵾk moⱡᵾng mbᵾ kᵾn, mindil kit mat nuing. 18 Uⱡ nᵾnt mbᵾ, kona ndamᵾng rui narᵾmba ui ti kᵾn, iti nᵾtangga nᵾk, Got kᵾn atinga rᵾi! 19 Nambuⱡ emel, ui ei kᵾn, uⱡ mindil nui elpa mat ekit omba. Ei, unt muⱡ mᵾi raⱡ puⱡ mondpa itim ui ei kᵾn, yant ndupa mindil nui nandrᵾng, mindil mat nuing. Omba wote, mindil kᵾⱡ mel kat, ama pi napᵾmba, mon! 20 Wote, Wu Nuim ei ndi, elim nga wamp mendpᵾⱡ kᵾⱡ nga nᵾndpa, uⱡ mindil nui ui ei, tᵾpa nondpa endᵾmba. Got nga wamp mendpᵾⱡ kᵾⱡ, mon elinga ndam, wamp ti moⱡpa ruⱡ, pi napᵾⱡnga. 21 Ui ei kᵾn, ‘Wamp ti ndi, Kraist ya ila morum kana!’ nimba. Muna, ‘Int ila morum nᵾm ndam,’ wamp ei nga nᵾm ik ei, mondᵾk pili nᵾpilᵾi! 22 Wu mat Kraist Got nga morung wu ralk, wote wu mat painui wu ralk, uⱡ min ngᵾn pi mat etᵾk, nᵾk itangina mba kapⱡa em ndam etᵾk, Got nga wamp mendpᵾⱡ mbᵾ kapⱡa, rukrᵾng tᵾng ndam, kapⱡa ting mint. 23 Ei nga uⱡ etmba ei mel, unt enim kundᵾp nᵾnt ei kᵾn, tᵾk mendᵾk muⱡᵾi!” nitim.

Muⱡᵾl Wu Kupa Ei Yant Omba

24 “Wote, mindil kit nong ui ei pora nangga, akil tepa,

‘Ant ei rumbᵾⱡ moⱡpa, kalimp ei rᵾⱡang pi napᵾmba. Mipil rangᵾnt mbᵾ, kawa ndupa, mana wangina, wi oⱡa muⱡ kona ei nga ronduⱡ mbᵾ, kᵾⱡ kᵾⱡ nimba roka ropa mana omba.’
26 “I em ei kᵾn, Muⱡᵾl Wu Kupa ei, kopa pol ila, Got nga ronduⱡ ei, rᵾpndi rᵾⱡang mbᵾ, tᵾpa mepa, kopa pol ila wangga kᵾning. 27 Wote, elim nga anggelo mbᵾ, tᵾpa mundangga puk, muⱡ uⱡ mbila puk, Got nga kᵾmp ropa titim wamp mbᵾ, kᵾmp kᵾm tᵾk, tenda etᵾk, mek rukᵾr uing,” nitim.

Nde Ui Mᵾn Etᵾm Uⱡ Ei Mel Kandᵾk, Tᵾk Mendᵾk Muⱡᵾi!

28 “Nde ui mbi paka etᵾm uⱡ ei ndi, enim uⱡ ti mbo indangga. Nde ui mbi paka etᵾm ei kᵾn, kona ant mba ui ei nondpa enim, nᵾk tᵾk mendᵾtmin. 29 Ei mel ku, uⱡ nᵾnt mbᵾ mel em kandᵾk, yant uimp nitim ui ndi, nondpa enim nᵾk pilᵾi! 30 Enim ik kupa ei, kundᵾp nᵾnt, ya wamp rᵾⱡaip akup ila monmᵾn kᵾⱡ, kolk pora ndui nᵾndangina, na nᵾnt uⱡ kᵾⱡ mel etmba. 31 Muⱡ mᵾi raⱡ tᵾnggᵾt kᵾn, pora ninggil. Wote, na nga ik ei, ama pora ni nanᵾmba mon!

Jisas Rumbᵾⱡ Muna Ant ila Omba Ei, Wamp Ti Pili Napᵾtmin

32 “Rumbᵾⱡ muna ant mong nant tila, uimp ui ei, wamp ti ndi, pili napᵾtmin. Wote, oⱡa muⱡ ila anggelo mbᵾ ndi kep, wote Got nga kangᵾm ei kep, mon ku. Oⱡa Wuta, elim mendpᵾⱡ pilpa morum. 33 Ei kᵾn, tᵾk mendᵾk, numan kundil nangga muⱡᵾi! Enim tᵾk mindi namᵾndᵾk muⱡangina, ui ei ekit omba. 34 Ui ei to rondpa, wu ti kona ruⱡ tila purum. Ei mel ku, kona ila mba etpa, elim nga kindmant wamp mbᵾ, kongun ndoimp rok iting ei mel, kᵾmp tᵾpa elpa elpa ngurum. Wote, keta puⱡ puⱡ rᵾp etᵾm wu ei kundpa, elim rumbᵾⱡ muna, ant mong nant ila yant uimp ui ei, rᵾp etᵾk muⱡᵾi!” nitim. 35 Ei kᵾn, manga puⱡ wu ei, epindama omba, muna ou ipri omba, muna rangᵾmba pilpa, mint tem ei kᵾn omba, muna ant oⱡa om ei kᵾn omba? Ei nga, rup etᵾk muⱡᵾi! Wote, wu ei tᵾpa tᵾndpa om ei kᵾn, enim ur piyangina omba, kᵾni nᵾkᵾnangga! 37 Enim kundᵾp nᵾnt ik ei, wamp pora, ik ku etᵾp kundᵾp nᵾnt. Ei nga, kandᵾk tᵾk mendᵾk muⱡᵾi!” nitim.